Buwaya

BUWAYA

tila buwaya'y mukhang Lacoste

pangmayaman, pangmay-sinasabi:

ang "Their Luxury, Our Misery"

na patamà sa mga salbahe

istiker o plakard sa lansangan 

na sa paglalakad nadaanan

kaya kaagad nilitratuhan

pagkat mensahe'y para sa bayan

lalo't buwaya'y bundat na bundat

pati contractor at kasapakat

pondo ng flood control ang kinawat

kaya pagbaha'y kaytinding sukat

sadyang sila'y mga walang budhi

walang dangal at kamuhi-muhi 

mga ganid na dapat magapi

sa pwesto'y di dapat manatili

kaban ng bayan na'y kinurakot

nilang kawatang dapat managot

sigaw ng bayan, lakip ay poot:

IKULONG ANG LAHAT NG KURAKOT!

- gregoriovbituinjr.

09.27.2025

Labanan ang katiwalian!

LABANAN ANG KATIWALIAN!

katiwalian ba'y paano lalabanan?

ng mga wala naman sa kapangyarihan

ng mga ordinaryong tao, mamamayan

ng kagaya kong naglulupa sa lansangan

iyang katiwalian ay pang-aabuso

ng pinagtiwalaan mo't ibinoto

para sa pansariling pakinabang nito

pondo ng bayan ang pinagkunang totoo

paano ba tayo magiging mapagbantay?

upang katiwalian ay makitang tunay!

paano ba bawat isa'y magiging malay?

na may korapsyon na pala't di mapalagay

ang mga tiwali'y paano mahuhuli?

kung krimen nila'y pinagmumukhang mabuti?

kung may mansyon na ba't naggagandahang kotse?

kung serbisyo'y negosyo na, imbes magsilbi?

dahil sa ghost flood control projects at pagbahâ

kayâ katiwalia'y nabatid ng madlâ

habang mayayama'y masaya't natutuwâ

dahil sa nakurakot sa kaban ng bansâ

salamat sa mga dumalo sa Luneta

at Edsa, pinakitang tumindig talaga

laban sa katiwalian at inhustisya

pagpupugay sa lahat ng nakikibaka!

- gregoriovbituinjr.

09.26.2025

* unang litrato mula sa google

* ikalawa'y kuha ng isang kasama

Kaming mga tibak na Spartan

KAMING MGA TIBAK NA SPARTAN

kami'y mga aktibistang Spartan

na apo ni Leonidas, palaban

tapat sa prinsipyo kahit masaktan

handang suungin kahit kamatayan

maipagtanggol lang ang sambayanan

nakikibaka kami araw-gabi

sa buhay man ay hirap, very busy

batid mang ang paglaban ay di easy

pinapatatag namin ang sarili

sistema'y inaaral nang mabuti

tutularan pa namin si Eurytus

di ang duwag na si Aristodemus

kaya nakikibaka kaming lubos

nang ginhawa'y kamtin ng masang kapos

at mawakasan ang pambubusabos

ng burgesya't tusong oligarkiya

ng mga kuhilang kapitalista

ng mga palamara't dinastiya

ng mga trapo't mapagsamantala

ng mga maygawa ng inhustisya

- gregoriovbituinjr.

09.24.2025

Pakikiisa sa sambayanan

PAKIKIISA SA SAMBAYANAN

naroon din ako sa Luneta

sa laban ng bayan nakiisa

laban sa mga katiwalian,

kagarapalan, at kabulukan

dapat nang palitan ang sistema

ng tusong trapo't oligarkiya

na serbisyo'y ginawang negosyo

na taumbayan ay niloloko

sigaw natin: sobra na, tama na!

baguhin ang bulok na sistema!

wakasan ang naghaharing uri!

lunurin na sila sa pusali!

ganyan ang galit ng sambayanan 

sa tuso't dinastiyang kawatan

hustisya ang ating minimithi

ngayon sana'y bayan ang magwagi

- gregoriovbituinjr.

09.24.2025

* kuha sa Luneta, 09.21.2025

* salamat sa kumuha ng litrato

Sigaw ni Maris: Serbisyo sa tao, huwag gawing negosyo!

SIGAW NI MARIS: SERBISYO SA TAO, HUWAG GAWING NEGOSYO!

si Maris Racal, isinigaw ngang totoo

"Serbisyo sa tao, huwag gawing negosyo!"

aba'y isinisigaw din ng dukha ito

pagkat ito'y kanilang tindig at prinsipyo

umalingawngaw ang kanyang boses sa bidyo

titindig talaga ang iyong balahibo

pagkat kayraming ipinaglalabang isyu

ang karapatan, pabahay, NAIA, sweldo

pampublikong serbisyo'y di dapat negosyo

ng oligarkiya't ng dinastiyang tuso

ng burgesya't ng kapitalistang dorobo

na ninanakawan ang taumbayan mismo

kaya maraming salamat sa iyo, Maris

pagkat sa sambayanan ay nakipagbigkis

hiniyaw mo'y tagos sa puso't aming nais

paninindigan itong di dapat magmintis

- gregoriovbituinjr.

09.23.2025

* mapapanood ang bidyo sa kawing na: https://web.facebook.com/reel/1129007608615208 

Basta may rali, umulan man ay lalabas

BASTA MAY RALI, UMULAN MAN AY LALABAS

basta may rali, umulan man ay lalabas

ganyan pag inadhika mo'y lipunang patas

paninindigan ang prinsipyo hanggang wakas

pagkat sa diwa't puso'y inukit nang wagas

nasa bahay magsusulat pag walang rali

pagsulat para sa bayan ay pagsisilbi

may upak sa mga proyektong guniguni

lalo na't sa isyung ito'y di mapakali

rain or shine, ang rali ay talagang tungkulin

di maga-absent pagkat nililikha natin

ay kasaysayan, basta payong laging dalhin

marami pang laban, huwag maging sakitin

ito nga'y tungkuling talaga kong niyakap

umulan man, nagsisipag at nagsisikap

kolektibong tutupdin ang mga pangarap

upang ginhawa'y kamtin ng bayan nang ganap

- gregoriovbituinjr.

09.23.2025

* mapapanood ang munting bidyo sa kawing na: https://web.facebook.com/share/v/1Ca7j42Yqm/ 

Pondo ng flood control, ilipat sa edukasyon!

PONDO NG FLOOD CONTROL, ILIPAT SA EDUKASYON

hiyaw nila: "Pondo ng flood control!"

tugon: "Ilipat sa edukasyon!"

pahayag ng mga tumututol

sa mga naganap na korupsyon

wasto ang kanilang panawagan

na dapat lang dinggin ng gobyerno

edukasyon ba'y kulang sa pondo,

sweldo ng guro't silid-aralan?

pondo ng flood control na naglaho

ay binulsa ng mga buwaya!

nagsilabasan na'y mga guro

sa rali'y sumigaw, nakiisa

dinggin natin ang hiyawang iyon

upang pondo sa wasto magugol:

sigaw nila'y "Pondo ng flood control!"

dapat "Ilipat sa edukasyon!"

- gregoriovbituinjr.

09.22.2025

* mapapanood ang bidyo sa kawing na: https://www.facebook.com/share/v/16LT7QmFYM/ 

Mabuhay ang Artikulo Onse!

MABUHAY ANG ARTIKULO ONSE!

sumisigid sa puso't diwa ko'y protesta

kaya lumahok ako sa rali ng masa

sumisikip na pati ang Luneta't Edsa

sa pagbaha ng taumbayang nakibaka

sumisilay ang kabulukan ng sistema

na dama ng panggitnang uri at ng masa

sumisikil sa bayan ang korupsyon, di ba?

na dapat maysalà'y mapanagot talaga

nasaad sa Artikulo Onse sa Konsti

ang probisyon hinggil sa accountability 

at paglahok sa grupong Artikulo Onse

ay paraan ko upang sa bayan magsilbi 

mabuhay ang lahat ng sumama sa rali

nang tuluyang baguhin ang sistemang imbi

tuligsain ang kurakutang nangyayari

matinong lipunan na'y hibik ng marami

- gregoriovbituinjr.

09.22.2025

Salamat, Anne Curtis!

SALAMAT, ANNE CURTIS!

salamat sa pakikiisa, Anne Curtis

laban sa katiwalian at just-tiis

hngad ng bayan ay makamit ang justice

ikulong ang kurakot ang kanilang wish

sa ShowTime, isa kang idolo, diyosa

na kinikilala ng maraming masa

ang pagtindig mo'y pagbibigay pag-asa

laban sa tiwali't bulok na sistema

salamat sa tindig laban sa korupsyon

at marahil na rin sa imbestigasyon

sa mga taong sa korupsyon nalulong

na mismong bayan ang kanilang ginunggong

salamat sa pakikiisa sa bayan

laban sa nangyayaring katiwalian

parglahok mo sa rali ng taumbayan

ay dagdag sa pag-ukit ng kasaysayan

- gregoriovbituinjr.

09.22.2025

* litrato mula sa fb

Ani Alwina

ANI ALWINA

siya si Alwina ng Mulawin

nagsalita laban sa korupsyon

ako'y nagpupugay, Angel Locsin

sa iyong paninindigan ngayon

sinabi niya, "Watching the hearings

I couldn't help but remember the news

and messages of those begging for help

People's home washed away, lives lost to floods."

anya, "Naiyak ako sa galit.

Pwede palang di sila maghirap.

Pwede pala ang walang nasaktan.

Pwede pala ang walang namatay."

"Ang bigat. Nakakakapanghina 'yung

ganitong kasamaan. Pero mas

nakakapanghina'y manahimik

lang tayo. We keep speaking, we keep

fighting for truth, for justice, for change, and

no politics, at para sa tao."

kaysarap tandaan ng sinabi

ni Angel na sa bayan mensahe

- gregoriovbituinjr.

09.22.2025

* litrato mula sa fb

Pakinggan ang sinisigaw nila

PAKINGGAN ANG SINISIGAW NILA

pakinggan natin ang sigaw nila

na katotohanang di makita

talaga ngang walang pinag-iba

ang mga pinunong palamara

di maipaliwanag ng isa

ang milyon-milyong ginastos niya

ng labing-isang araw, iyan ba

ang lider? mamumuno sa masa?

ang isa'y pinaupahang sadyâ

sa banyaga ang lupa ng bansâ

siyamnapu't siyam na taon ngâ

binenta na tayo sa banyagà

ilan iyan sa kanilang salà

kaya sumisigaw na ang madlâ

ilantad na ang mga kuhilà

sa kataksilan nito sa bansâ

kaya isinigaw nila'y tamà

huwag na nating ipagkailà

ang sistema'y baguhin nang sadyâ

upang tuminô ang ating bansâ

- gregoriovbituinjr.

09.22.2025

* mapapanood ang bidyo sa kawing na: https://www.facebook.com/share/v/1HrZix9yVj/ 

Tale of three Sara

TALE OF THREE SARA

ang una'y si Sara Piattos

di mapaliwanag ang gastos

milyon-milyon sa onse araw

banta pa'y may ipapapatay

ikalwa'y si Sara Dismaya

sa flood control, contractor pala

pondo ng bayan, isinubi

mga proyekto'y guniguni

kahanga-hanga ang ikatlo

singer na si Sarah Geronimo

sa kabataan, kanyang bilin

bulok na sistema'y baguhin

Sarah Geronimo, Mabuhay!

ngala'y nagniningning na tunay!

payo mo sa prinsipyo'y atas

itayo ang lipunang patas

- gregoriovbituinjr.

09.20.2025

* litrato mula sa fb page ng ABS-CBN News

* ulat mula sa https://abscbn.news/3VXIDlL 

Pangarap ko'y sa laban mamatay

PANGARAP KO'Y SA LABAN MAMATAY

sakaling ako'y biglang mamatay

ayokong mamatay lang sa sakit

nais kong sa laban humandusay

binira, binara, o binaril

halimbawa, nabasag ang mukha

nagkabatuhan sa demolisyon

sa pakikibaka'y bumulagta

dahil tinutupad ko ang misyon

ayokong mamatay lang sa banig

ng karamdaman, ako'y tatayo

habang nakikipagkapitbisig

sa masang sa hirap na'y siphayo

nais kong matulad kay Eurytus

na buhay ay sa laban nagwakas

di matulad kay Aristodemus

na tumalima lamang sa atas

sabi, kapwa sila pinauwi

ni Leonidas dahil sa sakit

sa mata, sa harap ng tunggali

sa Thermopylae, sandata'y sukbit

sa historya, sila'y naging tanyag

si Eurytus ay naging bayani

si Aristodemus nama'y duwag

ako naman sa masa'y nagsilbi

- gregoriovbituinjr.

09.18.2025

Paanyaya sa Setyembre 21, 2025

bayan, nalulunok mo pa ba

iyang katiwalian nila

nabibilaukan ka na ba

sa proyektong 'ghost' wala pala

bayan ko, binaha ka na ba

dahil flood control palpak pala

kabang bayan pala'y binulsa

ganyan kabulok ang sistema

kung ang ganyan ay ayaw mo na

at tingin mo'y may pag-asa pa

tara, ikaw na'y makiisa

mula Luneta hanggang EDSA

Luneta tayo sa umaga

hapon naman tayo sa EDSA

doon tayo'y magsama-sama

sa Setyembre 21, tara

- gregoriovbituinjr.

09.17.2025

* September 21, 2025 - 53rd anniversary of Martial Law in the Philippines and 44th commemmoration of International Day of Peace

Babaha muli sa lansangan

BABAHA MULI SA LANSANGAN

noong bumaha sa lansangan

halos malunod na ang bayan

pondo ng flood control, nasaan

binabaha pa rin ang daan

ay, pulos pala guniguni

kaya masa'y namumulubi

pondo'y binulsa, isinubi

ng mga kawatan, salbahe

kaya sa September twenty one

babahang muli sa lansangan

maniningil ang taumbayan

ibagsak ang mga kawatan

subalit isyu na'y sistema

pamamayagpag ng burgesya

oligarkiya't dinastiya

kapitalismo'y wakasan na

imbes panlipunang serbisyo

imbes magkatubig sa gripo

imbes na tumaas ang sweldo

serbisyo'y ginawang negosyo

ah, babahang muli ang masa

mula Luneta hanggang EDSA

upang baguhin ang sistema...

upang baguhin ang sistema!

- gregoriovbituinjr.

09.17.2025

* mapapanood ang bidyo sa kawing na: https://www.facebook.com/share/v/1JB2ULyRQD/ 

Kapag nagalit ang taumbayan

KAPAG NAGALIT ANG TAUMBAYAN

kapag nagalit ang taumbayan

sa talamak na katiwalian

nangyari sa Indonesia't Nepal

sa Pinas nga ba'y maiiwasan?

iyan ay malaking katanungan

sa Indonesia't Nepal, nagalit

na ang taumbayan sa korapsyon

pati gusali ng parlamento

ay nilusob ng masa't sinunog

na sa korapsyo'y tanda ng poot

nagawa ang di inaasahan

sa Pinas ba'y mangyayari iyan?

aba'y naging legal ang nakawan

sa proyekto ng pamahalaan

ghost project nga'y pinag-uusapan

tumbukin ang tunay na problema

iyang kapitalismo talaga

tipid sa serbisyong panlipunan

sa ghost project, binaha ang bayan

korporasyon ang nakikinabang

bulok na sistema ang dahilan

kasakiman at kapangyarihan

oligarkiya, trapong gahaman

at dinastiya pa'y naririyan

na dapat ibagsak nang tuluyan

- gregoriovbituinjr.

09.16.2025

* ang litkuran (litrato sa likuran o background) ay mula sa pahayagang Bulgar, Setyembre 13, 2025, pahina 2-3

Di ko matiis na di lumahok

DI KO MATIIS NA DI LUMAHOK

di ko matiis na di lumahok

sa rali laban sa mga hayok 

bayan ay talagang inilugmok

ng mga kuhila't trapong bugok

hahayaan ba nating mandambong

pa ang mga tiwali't nanggunggong

sa bayan, aba'y dapat makulong

silang mga ganid at ulupong

ninakaw ay di lang simpleng pera

kundi higit ay buhay ng masa

kumilos na kontra dinastiya,

tusong burgesya't oligarkiya

pag nabigyan ng pagkakataon

ng kasaysayan, tayo'y naroon

sistemang matino'y ating layon

at paglilingkod sa masa'y misyon

ang sistemang bulok na'y palitan

ng sadyang nagsisilbi sa bayan

itayo'y makataong lipunan,

patas, parehas, makatarungan 

- gregoriovbituinjr.

09.15.2025

Daang tuwid at prinsipyado

DAANG TUWID AT PRINSIPYADO

kahit pa ako'y maghirap man

mananatilng prinsipyado

nakikipagkapwa sa tanan

tuwina'y nagpapakatao

naglalakad pag walang pera

nang masang api'y makausap

patuloy na nakikibaka

upang matupad ang pangarap

na lipunang pantay, di bulok

pagkat sadyang di mapalagay

laban sa tuso't trapong bugok

kumikilos nang walang humpay

daang tuwid ang tatahakin

ng mga paang matatatag

matinong bansa'y lilikhain

lansangang bako'y pinapatag

- gregoriovbituinjr.

09.15.2025

Ang maiaalay sa mundo

ANG MAIAALAY SA MUNDO

iyon lang ang maiaalay ko sa mundo

ang ibigay yaring buhay para sa kapwa

at maitayo ang lipunang makatao

at patas sa pagkilos nating sama-sama

sasakahin natin ang mga kabukiran

talbos, gulay at palay ay ating itanim

pinakakain ng pesante''y buong bayan

ngunit sila pa'y api't mistulang alipin

suriin ang lipunan at sistemang bulok

oligarkiya, trapo't dinastiya'y bakit

sa kapangyarihan ay gahaman at hayok

kaylupit pa nila sa mga maliliit

marapat lang nagpapakatao ang lahat

at ipagtanggol din ang dignidad na taglay 

kaya sa pagkilos sa masa'y nakalantad

sa mundong ito'y inalay na yaring buhay

- gregoriovbituinjr.

09.07.2025

* litratong kuha sa bayan ng Balayan, lalawigan ng Batangas

Pribatisasyon ng NAIA, Tutulan

PRIBATISASYON NG NAIA, TUTULAN

sa NAIA, kayraming bagong fees

nagsimula sa surot at ipis

isinapribado nang kaybilis

naririyan ang parking fees,

terminal fees, airport fees.

take-off fees, landing fees.

lighting fees, utility fees.

rental fees, service fees.

at marami pang iba't ibang fees

pasahero'y magtitiis

sa mga nagtaasang fees

ay, nakapaghihinagpis

kaya maitatanong mo

at mapapaisip dito

bakit ginawang negosyo

ang pampublikong serbisyo

panawagan sa kapitalista

aba'y dapat n'yo lang itigil na

ang pribatisasyon ng NAIA

na sa masa'y kaysakit sa bulsa

ang panawagan natin sa masa

magkapitbisig at magkaisa

tutulan, pribatisasyon ng NAIA

baguhin ang bulok na sistema

- gregoriovbituinjr.

09.04.2025

* salamat sa kumuha ng litrato

Lipunang malaya't matinô

LIPUNANG MALAYA'T MATINÔ

pangarap ko'y malaya't matinong lipunan

umiiral ay patas at makatarungan

na walang api't pinagsasamantalahan

ng dinastiya, oligarkiya't gahaman

pangarap ko'y lipunang matino't malayà

kung saan walang trapo't burgesyang kuhilà

sa anumang pakikibaka'y laging handâ

kumikilos kasama ng obrero't dukhâ

pangarap ko'y lipunang malaya't matinô

na lahat ng lahi't bansa'y nagkakasundô

umiiral ay di pagkaganid sa gintô

kundi pakikipagkapwa sa buong mundô

lipunang matino't malaya ang pangarap

na makamit na bawat isa'y lumilingap

sa kanyang kapwa, kaya tayo na'y magsikap

na abutin ang kaytayog mang alapaap

- gregoriovbituinjr.

09.02.2025

Nais ko'y ukit na maso sa lapida

NAIS KO'Y UKIT NA MASO SA LAPIDA

sakaling mamatay / ang makatang kapos

ayoko ng daop / na palad o kurus

kundi yaong masong / gamit ng busabos

nang sistemang bulok / ay buwaging lubos

hindi natin batid / kailan babagsak

ang katawang lupa / sa putik o lusak

sakaling ibaon / saanpamang lambak

sa lapida'y nais / na ito'y itatak:

"narito'y makatâ / ng obrero't dukhâ

tagapagtaguyod / ng sariling wikà

tibak na Ispartan / sa puso at diwà

sistema'y palitan / ang inaadhikà

panay ang pagtulâ / kahit makulimlim

sa masa'y nagsilbi / ng tapat at lalim

sa dumaan dito't / sumilong sa lilim

nagpapasalamat / siya ng taimtim"

- gregoriovbituinjr.

09.01.2025

* larawan ay dinisenyo ng makatang galâ

Sa pambansang araw ng mga bayani

SA PAMBANSANG ARAW NG MGA BAYANI

di lang sina Jacinto, Andres, Luna't Rizal

ang mga bayaning dapat nating itanghal

sa kasalukuyan, maraming mararangal

na kaylaking ambag sa bayan, nagpapagal

kayraming bayaning mga walang pangalan

na talaga namang naglingkod din sa bayan

uring manggagawa at taong karaniwan

sa bawat bansa'y tagapaglikha ng yaman

nariyan ang mga mangingisda, pesante

nariyan ang ating mga ina, babae

aktibista muna bago naging bayani

ngunit di ang mga pulitikong salbahe

ang mga O.F.W. ay bayani rin

na remittances ang ambag sa bayan natin

di man sila kilala'y dapat ding purihin

na mga inambag ay di dapat limutin

ang uring manggagawa ang tagapaglikha

nitong ekonomya't mga yaman ng bansa

mangingisda't magsasaka'y tagapaglikha

nitong mga pagkain sa hapag ng madla

sa lahat ng mga bayani, pagpupugay!

tunay na magigiting, mabuhay! Mabuhay!

nagawa ninyo sa bayan ay gintong lantay

na sa pamilya't bayan ay ambag na tunay

- gregoriovbituinjr.

08.25.2025

Sa Buwan ng Kasaysayan

SA BUWAN NG KASAYSAYAN

patuloy lamang tayong magbasa

ng mga aklat sa kasaysayan

baka may mabatid pa ang masa

na nakatago pang kaalaman

tara, mandirigma't magigiting

o makabagong Katipunero

panlipunang sistema'y aralin

bakit ang daigdig ay ganito

mga digmaan ay anong dami

nais manakop ng ibang bansa

bakit may mga bansang salbahe

nangapital versus manggagawa

asendero versus magsasaka

pananakop versus tamang asal

elitista't mga dinastiya

versus masang kanilang nasakal

kasaysayan ay di lang si Andres

Bonifacio o Rizal, bayani

kundi pati masang ginagahis

sinasamantala't inaapi

dapat lamang baguhin ang bulok

na sistema, kaya pag-aralan

ang kasaysayan ng nasa tuktok

ng gumagawa't nasa laylayan

- gregoriovbituinjr.

08.23.2025

Balitang welga

BALITANG WELGA

panig ba ng unyon ay naibulgar?

o ng manedsment lang sa dyaryong Bulgar?

nabayaran kaya ang pahayagan?

upang nagwelgang unyon ay siraan?

nang ako'y naging manggagawa dati

pabrikang KAWASAKI ay katabi

ng pabrikang noo'y pinasukan ko

doon sa Alabang, pabrikang PECCO

kaya ang laban ng kanilang unyon

sa kalooban ko'y malapit iyon

sa tarangkahan nga ng Kawasaki

papasok upang magtrabaho kami

nawa ang panig din ng nagwewelga

sa Bulgar ay maibalita sana

di lang ang panig ng nagnenegosyo

kundi't higit ang panig ng obrero

- gregoriovbituinjr.

08.06.2025

* ulat mula sa pahayagang Bulgar, Agosto 6, 2025,  pahina 2

* PECCO - Precision Engineered Components Corporation

Pahimakas kay kasamang Rod

PAHIMAKAS KAY KASAMANG ROD

(binigkas ng makatang gala sa pugay-parangal)

sa iyo, kasama, pagpupugay

sa pagpapatibay mo ng hanay

sa adhikaing lipunang pantay

para sa masa, misyon mo'y lantay

ating kasamang Rod Guarino

mahusay makitungo sa tao

kasama ng guro, prinsipyado

organisador siyang totoo

naging secgen namin sa BMP

naging pangulo namin sa XD

organisador pa ng TDC

at sa Ating Guro pa'y nagsilbi

salamat sa lahat ng nagawa

pinaglaban ang isyu ng madla

kasangga ng uring manggagawa

kaisa ng guro't maralita 

pakikibaka ang ibinunsod

ng pagkilos mo at paglilingkod

ginhawa ng masa'y tinaguyod

taasnoong pagpupugay, Ka Rod

- gregoriovbituinjr.

07.03.2025

* BMP - Bukluran ng Manggagawang Pilipino

* XDI - Ex-Political Detainees Initiative

* TDC - Teachers Dignity Coalition 

* Ating Guro party list

Sa ika-128 anibersaryo ng pagpaslang sa Supremo

SA IKA-128 ANIBERSARYO NG PAGPASLANG SA SUPREMO

pag-alala sa kamatayan ng Supremo

at ating bayaning Gat Andres Bonifacio

kasama ng kapatid niyang si Procopio

pinaslang sila ng pangkating Aguinaldo

kaya inaral ko ang ating kasaysayan

na sa wari ko'y pilit kinakaligtaan

bakit kapwa Katipunero ang dahilan

ng pagpaslang sa Supremo ng Katipunan

Mayo a-Nwebe, kaarawan ng maybahay

na si Oriang, Mayo a-Dyes, siya'y pinatay

ng mga taksil sa ating bayan, niluray

pati kanyang pagkatao, nakalulumbay

marahil si Oriang siya na'y hinahanap

sa kaarawan nitong dapat ay kalingap

kinabukasan pala'y napatay nang ganap

hanggang huli'y di man lang sila nagkausap

taaskamaong pagpupugay kay Gat Andres

sa adhikain nila't pakikipagtagis

upang lumaya ang bayan, di na magtiis

sa lilong burgesya't dayong mapagmalabis

- gregoriovbituinjr.

05.10.2025

Walang pag-aari

WALANG PAG-AARI

pribadong pag-aari ang ugat ng kahirapan

at isa iyang katotohanang matutuklasan

pag pinag-aralan ang ekonomya at lipunan

katotohanang dapat tumagos sa sambayanan

subalit di iyan tinatanggap ng mga sakim

sa kapangyarihan at ng may budhing maiitim

tulad ng trapo't kapitalistang dulot ay lagim

kasamaan at kadilimang karima-rimarim

bago pa si Marx ay mayroon nang Marcus Aurelius

noong unang panahon ay batid na nilang lubos

pribadong pag-aari'y sanhi ng pambubusabos

at pagyurak ng dangal ng mga dukha't hikahos

halina't katotohanang ito'y ipalaganap

baguhin na ang sistema nang malutas ang hirap

magagawa kung patuloy tayong magsusumikap

upang ating kamtin ang ginhawang pinapangarap

- gregoriovbituinjr.

04.17.2025

Manggagawa ang lumikha ng pag-unlad

MANGGAGAWA ANG LUMIKHA NG PAG-UNLAD

habang lulan ng bus ay nakita ko

yaong mga nilikha ng obrero:

ang mga gusaling nagtatayugan

mga tulay, paaralan, lansangan

na pawang ginawa ng manggagawa

maging ng mga kontraktwal na dukha

lumikha ng gusali ng Senado,

Simbahan, Malakanyang at Kongreso

nasaan ang kanilang kinatawan

sa parlamento, sa pamahalaan

bakit pulitikal na dinastiya

yaong mga naluklok, at di sila

Manggagawa Naman! ang aming sigaw

obrerong nagpapawis buong araw

at gabi upang bayan ay umunlad

at bansa ay patuloy na umusad

upang masa'y di manatiling lugmok

upang mawala ang pinunong bugok

upang palitan ang sistemang bulok

sina Leody at Luke ay iluklok

- gregoriovbituinjr.

03.31.2025

#21 Ka Leody De Guzman para Senador

#25 Atty. Luke Espiritu para Senador

* mapapanood ang bidyo sa kawing na: https://www.facebook.com/share/v/18pLAckmcr/ 

Pagsusumikap

PAGSUSUMIKAP

kailangan ko ba ng inspirasyon

upang makamit ko ang nilalayon?

o dapat ko lamang pagsumikapan

ang pinapangarap ko kung anuman?

pampasigla nga ba ang inspirasyon?

paano kung wala? paano iyon?

marahil, mas kailangan ay pokus

upang kamtin ang pangarap mong lubos

sino bang inspirasyon ng makata?

upang samutsaring tula'y makatha

marahil nga'y may musa ng panitik

na ibinulong ay isasatitik

oo, nagsusumikap pa rin ako

bakasakaling magawa ko'y libro

ng tula, maikling kwento't sanaysay

o baka nobela'y makathang tunay

- gregoriovbituinjr.

03.24.2025

Thomas Edison: "Success is 10% inspiration and 90% perspiration."

Albert Einstein: "Genius is 1% inspiration and 99% perspiration."

Laban sa bugok at sistemang bulok

LABAN SA BUGOK AT SISTEMANG BULOK

(Alay sa World Poetry Day 2025)

ang pag-iral ng dinastiya'y kabulukan

ng sistemang sanhi ng laksang kahirapan

pagbalikwas laban dito'y dapat tuunan

ng pansin ng api't pinagsamantalahan

wala sa sinumang trapong bugok at bulok

ang tutubos sa ating bayang inilugmok

ng mga dinastiyang naupo sa tuktok

lalo't sa yaman ng bayan ay pawang hayok

halina't buksan yaring diwa, puso't taynga

at damhin ang sugat ng mga nagdurusa

dinggin ang tinig ng nakararaming masa:

dapat nang wakasan ang bulok na sistema!

ang tibak na Spartan ito'y nalilirip

habang samutsari yaong nasasaisip

masang naghihirap ay tiyaking mahagip

maging mulat sila't sa sistema'y masagip

- gregoriovbituinjr.

03.21.2025

Pagsali, pagsalin, pagsaling

PAGSALI, PAGSALIN, PAGSALING

(Alay sa World Poetry Day 2025)

nais kong sumali sa mga paligsahan

at sa madla'y ipakita ang kahusayan

sa palakasan man, spelling o takbuhan

bakasakaling may premyong mapanalunan

o pagsasalin ng akda'y trinatrabaho

aklat man, artikulo, pabula o kwento

munti mang bayad ay may ginhawang totoo

na makabubuhay naman sa pamilya mo

garapal na dinastiya'y dapat masaling

ng mamamayang bumalikwas na't nagising

mula sa kayhaba nilang pagkagupiling

habang burgesyang bundat ay pagiling-giling

pagsali, pagsalin, pagsaling ng makatâ

habang pinagsisilbi ang mga salitâ

ukol sa kapakanan ng mga dalitâ

nang sistemang bulok ay kanilang magibâ

- gregoriovbituinjr.

03.21.2025

Sa sakayan

SA SAKAYAN

alas-singko ng hapon, mahirap sumabay

sa mga nag-aabang na nais sumakay

ng dyip pauwi sa patutunguhang tunay

naglakad na lang ako habang nagninilay

maluwag pa pag alas-tres o alas-kwatro

at marami nang pauwi pag alas-singko

ang nakaupo sa dyip ay dulo sa dulo

kaypalad mo pag nakaupo kang totoo

ah, mabuti pa ngang ako'y maglakad-lakad

hinay-hinay lang at huwag bilisan agad

kahit tulad ng pagong, marahan, makupad

at sa paglubog niring araw ay mabilad

may paparating na dyip, sana'y di pa puno

pagkat lalakarin ko'y talagang malayo

kung walang dyip, maglakad kahit na mahapo

mahalaga'y marating kung saan patungo

- gregoriovbituinjr.

03.20.2025

Kaygandang musika sa kampanya

KAYGANDANG MUSIKA SA KAMPANYA

habang sakay ng trak sa kampanya

dinig ko ang kaygandang musika

nag-aalab ang pakikibaka

upang hustisya'y kamtin ng masa

laban sa kuhila't mapang-api

laban sa oligarkiyang imbi

dinggin ang musika't sinasabi

sa Senado'y mayroong kakampi

sina Ka Leody't Attorney Luke

mga lider-manggagawang subok

sa Senado ay ating iluklok

upang palitan ang trapong bugok

Ka Leody at Luke Espiritu

magagaling na lider-obrero

kakampi ng masa sa Senado

kaya sila ay ating iboto

- gregoriovbituinjr.

03.17.2025

* mapapanood ang bidyo sa kawing na: https://web.facebook.com/share/v/19PFaTv1s4/ 

#21 Leody de Guzman

#25 Luke Espiritu

Maralita para kina Ka Leody at Atty. Luke sa Senado

MARALITA PARA KINA KA LEODY AT ATTY. LUKE SA SENADO

kaming mga maralita'y para kina Ka Leody

de Guzman at Attorney Luke Espiritu sa Senado

sila ang totoo nating mga kasangga't kakampi

tungong kapakana't kagalingan ng dukha 't obrero

lalabanan nila ang salot na kontraktwalisasyon

lalo ang mga walang kabusugang kapitalista 

sila ang kasangga ng dukha laban sa demolisyon

silang kalaban ng mapang-api't mapagsamantala

lalo't nangingibabaw batas ng naghaharing uri

upang magkamal pa ng tubo 't manatili sa poder

hindi nila hahayaang maralita'y maduhagi

at titiyaking madurog ang oligarkiyang pader

babaguhin din nila ang patakarang mapang-api

na nakikinabang ay burgesya't elitistang bundat

didistrungkahin ang batas na dahilang masasabi

hinggil sa malayong agwat ng mayaman at mahirap

maipanalo sila sa Senado ang unang hakbang 

upang magkaroon ng kinatawan ang maralita

ang maipagwagi sila'y tagumpay ng sambayanan 

upang mga batas na pangmasa'y kanilang malikha 

- gregoriovbituinjr.

03.16.2025

alay, malay, malaya

ALAY, MALAY, MALAYA

inalay ko na yaring buhay

sa pagkilos para sa masa

at misyon ay ipagtagumpay

upang mabago ang sistema

inalay na ang buong galing

laban sa mapagsamantala

nang masa'y tuluyang magising

laban sa kuhila't burgesya

ang paglaya sa pang-aapi't

anumang pagsasamantala

ay prinsipyo naming sakbibi't

sa puso't diwa'y laging dala

mahalaga ngang maging malay

sa nangyayari sa paligid

kaya aming adhikang taglay

sa inyo'y dapat ipabatid

maging malaya sa kapital

malaya sa kapitalismo

itatayo, di magtatagal

yaong lipunang makatao

- gregoriovbituinjr.

03.15.2025

Buhay-pultaym

BUHAY-PULTAYM

oo, prinsipyo ang bumubuhay sa akin

di salapi, di datung, di pera, di atik

aktibistang Spartan pa rin hanggang ngayon

na kumikilos upang tuparin ang misyon

di ako nabubuhay upang kumain lang

kumakain ako upang mabuhay lamang

nakatuon pa ring tuparin ang adhikà

para sa maralita't uring manggagawà

di natapos ang B.S.Math sa kolehiyo

upang magpultaym at kumilos sa obrero

pasya'y pinag-isipan hanggang sa lumisan

doon sa apat na sulok ng paaralan

naglalakad upang sa pulong makarating

nag-ipon sa tibuyô upang may gastusin

binubuhay ng masang pinaglilingkuran

pamilya na'y bayan, ganyan ang buhay-pultaym

- gregoriovbituinjr.

03.14.2025

Raliyista kanina, ngayon ay labandero

RALIYISTA KANINA, NGAYON AY LABANDERO

raliyista kanina, ngayon ay labandero

ganyan nga ang aktibistang Spartan tulad ko

matapos ang rali, may iba pang misyon tayo

may mga toka roon at may toka pa rito

bukod sa bayan, pamilya'y inaasikaso

kailangang maglaba, magkusot, at magbanlaw

saka naman isusunod yaong pagsasampay

mabuti kung iyon pa'y mainitan ng araw

kasama talaga ang paglalaba sa buhay

upang may suutin pag mainit o maginaw

pag natuyo naman, tuloy ang pakikibaka

para sa makataong lipunan at hustisya

may maayos tayong suot pagharap sa masa

may respeto sa atin ang inoorganisa

mapakitang marangal ang mga aktibista

- gregoriovbituinjr.

03.08.2025

Ngayon pong Araw ng Kababaihan

NGAYON PONG ARAW NG KABABAIHAN 

ngayon pong Araw ng Kababaihan 

ako'y taaskamaong nagpupugay

sa mga ilaw ng bawat tahanan

sa lahat ng lola at mga nanay

babae kayong nagluwal sa amin

nag-alaga, nagpasuso ng gatas

nagpalaki, nagmahal, nagpakain

gabay namin sa maayos na landas

kayo'y mga asawang iniibig

di sinasaktan pagkat minamahal

kayo ang kalahati ng daigdig

kayong sa mundo'y bumuhay, nagpagal

kayo'y lola, ina, tiya, kapatid,

pinsan, kaklase, katrabaho, mare,

kayong pag-ibig ang inihahatid

kayo'y Gabriela, Oriang, bayani

salamat po sa inyong sakripisyo

mula sinapupunan, nag-aruga

maraming salamat, nariyan kayo

na mga ginawa'y sadyang dakila

- gregoriovbituinjr.

03.08.2025

* mapapanood ang bidyo sa kawing na: https://web.facebook.com/share/v/1Gpe23Vv9k/ 

Sa Araw ng Kababaihan

SA ARAW NG KABABAIHAN

pakikiisa ko'y mahigpit

sa Araw ng Kababaihan

sasama ako't igigiit

kanilang mga karapatan

bukas ay dadalo sa rali

upang ipagdiwang ang Araw

ng magigiting na Babae

at sila rin ang bumubuhay

sa mamamayan ng daigdig

silang kalahati ng mundo

sila ang pusong nagpapintig

sa akin, sa masa, sa tao

lola, ina, tiya, kapatid,

asawa, kasintahan, guro,

sa bawat babae ang hatid

ko'y pagpupugay, buong-buo

at sa Dakilang Araw nila

kalalakiha'y kikilos din

kapitbisig at sama-sama

na lipunang ito'y baguhin

- gregoriovbituinjr.

03.07.2025

Pag-ambag ng dugo

PAG-AMBAG NG DUGO

bilang aktibista, nais kong makatulong

sa aking kapwa, kahit magbigay ng dugo

para sa nangangailangan, nilalayon

kong ang masa'y maging malusog, di tuliro

makapag-ambag ng dugo'y magandang gawâ

di lang pulos pakikibaka sa kalsada

malaking tulong sa karaniwan mang dukhâ

lalo na't dugo pala'y kailangan nila

simpleng gawa, simpleng misyon sa sambayanan

kaya nang sa Farmers, Cubao ay makita ko 

na may Blood Donation Drive ay nagkusa naman

bilang tibak ako'y agad nagboluntaryo

upang sa sinuman dugo ko'y maisalin

dahil saksi ako sa aking misis noon

sa ospital, sa unang araw pa lang namin

dugong tatlong bag sinalin kay misis doon

kaya pagbibigay ng dugo'y naidagdag

sa aking misyon dito sa mundong ibabaw

kaysarap sa pakiramdam na may naambag

sa kapwa upang makapagdagdag ng búhay

- gregoriovbituinjr.

03.06.2025

* litratong kuha sa Blood Extraction Area ng Philippine Red Cross QC Chapter sa Farmer, Cubao, Marso 6, 2025

Ang dapat maluklok

ANG DAPAT MALUKLOK

katatapos lang ng bayan sa paggunitâ

sa anibersaryo ng Pag-aalsang Edsa

isang aral na nakita ko'y maging handâ

kung sakali mang mag-alsa muli ang masa

napagnilayan ko ang uring manggagawà,

maralita, kababaihan, magsasaka

mga inang dahil sa tokhang lumuluhà

ay, paano ba babaguhin ang sistema

kung ang Pag-aalsang Edsa'y muling mangyari

dapat dahil sa pagbabagong ating mithi

dahil ang mapagsamantala't mapang-api

ay dapat mawala't di na makapaghari

wasto lang na tunguhin nati'y tamang landas

kung saan wawakasan ang sistemang bulok

itatag natin ang isang lipunang patas

at mula uring manggagawa ang iluklok

- gregoriovbituinjr.

03.06.2025

Suot ang bota kapag namatay

SUOT ANG BOTA KAPAG NAMATAY

kung sakali mang ako'y matsugi

nais kong tangan pa rin ang mithi

na magwagi ang mga kauri

na baguhin ang sistemang imbi

di ang mamatay sa katandaan

di ang maratay sa karamdaman

mas nais kong mamatay sa laban

tungong pagbabago ng lipunan

may isang popular na idiom

sabi'y "I'd like to die with my boots on."

iyan din ang aking nasa't layon

hanggang maipagwagi ang misyon

mamatay sa misyon ay kaytamis

isang halimbawa ay kaparis

ng pagkapaslang kay Archimedes

na isang mathematician sa Greece

ito ako, karaniwang tao

kapiling ng masa at obrero

tagumpay sana'y masilayan ko

habang naririto pa sa mundo

- gregoriovbituinjr.

03.05.2025

* mula sa Wikipedia: "To "Die with your boots on" is an idiom referring to dying while fighting or to die while actively occupied/employed/working or in the middle of some action. A person who dies with their boots on keeps working to the end, as in "He'll never quit—he'll die with his boots on." The implication here is that they die while living their life as usual, and not of old age and being bedridden with illness, infirmity, etc."

https://en.wikipedia.org/wiki/Die_with_your_boots_on

Sa pagtatagumpay

SA PAGTATAGUMPAY

maraming dapat gawin upang magtagumpay

sa ating buhay, sa bahay, sa hanapbuhay

anumang suliranin ang nakabalatay

ay malalampasan kapag tayo'y nagsikhay

ang buhay nati'y di pulos laban at galit

dahil sa mga karapatang pinagkait

dahil binubusabos na ang maliliit

kundi mayroon ding panahon ng pag-awit

buhay ay punong-puno ng pakikibaka

lalo na't hanap ay panlipunang hustisya

paano wakasan ang mga dinastiya

na isang dahilan ng bulok na sistema

magtatagumpay lang tayo sa minimithi

kung sama-samang kikilos ang ating uri

upang wakasan na ang sangkaterbang hikbi

dahil sa kagagawan ng kuhila't imbi

- gregoriovbituinjr.

03.03.2025

Esensya

ESENSYA

matagal ko nang itinakwil ang sarili

upang sa uri at sa bayan ay magsilbi

lalo na't ayokong maging makasarili

sapagkat buhay iyong di kawili-wili

mabuti pa ngang magsilbi tayo sa masa

magsilbi sa maliliit, di sa burgesya

labanan ang mga kuhila't dinastiya

kahulugan ng buhay ay doon nakita

esensya ng buhay tuwina'y nalilirip

kapiling ng masa't dukhang dapat masagip

mula sa hirap, ginhawa ba'y panaginip?

tibak na tulad ko'y kayraming nasa isip

uring manggagawa, hukbong mapagpalaya

ang laging isinisigaw ng aking diwa

manggagawa't magsasaka ang mapagpala

na sana'y magtagumpay sa inaadhika

- gregoriovbituinjr.

03.03.2025

Isang aral ng Edsa ang sama-samang pagkilos

ISANG ARAL NG EDSA ANG SAMA-SAMANG PAGKILOS

buhay ang sama-samang pagkilos ng sambayanan

buhay ang Edsa sa atin, sa diwa't kalooban

aral ng sama-samang pagkilos ay kailangan

upang mabago ang bulok na sistema't lipunan

sobra na ang pamumuno ng burgesyang kuhila

wakasan ang dinastiyang pulitikal sa bansa

asahan na natin ang alternatibo ng madla

ang uring manggagawa, ang hukbong mapagpalaya

isang aral ng Edsa ang sama-samang pagkilos

ng magkakauri upang kabuluka'y matapos

wakasan ang pagsasamantala't pambubusabos

ng mga elitista sa uring naghihikahos

wakasan ang pamamayagpag ng oligarkiya,

ng kapitalista, ng asendero, elitista

O, Bayan ko, wakasan na ang bulok na sistema!

at sama-samang itayo ang gobyerno ng masa!

- gregoriovbituinjr.

02.25.2025

* litratong kuha malapit sa People Power Monument habang ginugunita ang ika-39 na anibersaryo ng Unang Pag-aalsang Edsa